Пушарсем чылай чухне хамăр асăрханусăр, тимсĕр пулнипе сиксе тухаççĕ. Вут-çулăм вара нимĕн те тиркемест, веçех тĕп тăвать. Вăрнарти 27-мĕш пушар чаçĕнсен пĕлтернĕ тăрăх майăн 9-мĕшĕнче Çĕнъял Хапăсри çитмĕле çывхаракан А.Георгиева хуçалăхĕнче 20 сехет те 15 минутра «хĕрлĕ автан» ташлама тытăннă. Мунчаран тата лаçран кăмрăк купи кăна тăрса юлнă. Сăлтавĕ - кăмака хутнă чухне пушар хăрушсăрлăх правилисене пăхăнманни. Тепĕр кунне Шĕнер Ишекри В.Михайлов хуçалăхĕнче килхуçи чĕлĕм туртнă чухне асрăханусăр пулнăран сарай çунса кайнă. Ачасем шăрпăкпа выляни час-часах инкек патне илсе çитерет. Çак сăлтава пулах иртнĕ вырсарникун Волонтер ялĕнчи Ивановсен сарайĕсенчен кĕл купи кăна тăрса юлнă. Çуллахи вăхăтра пушар тухас хăрушлăх çав тери пысăк. Çавăнпа тимлĕрех пуласчĕ.