Иртнĕ шăматкун Физкультурник кунне халалласа районта массăллă спорт ăмăртăвĕсем, тĕрлĕ эстафетăсемпе турнирсем иртрĕç. Вăрнарти «Химик» стадионта та уява чĕнсе ирех савăнăçлă юрă-кĕвĕ янăрарĕ, сывă пурнăç йĕркине кăмăллакансене ăмăртусене хутшăнма йыхравларĕ. Спорт уявне сывлăха çирĕплетмелли «Ластокча» лагерьте канакансен уяв парачĕпе пуçларĕç. Спортсменсене, тренерсене, физкультура юхăмĕн ветеранĕсене, спорта юратакансене район администрацийĕн пуçлăхĕн пĕрремĕш çумĕ Григорий Игнатьев саламларĕ, пурне те савăк, çĕкленÿллĕ кăмăл, спортра кăна мар, пурнăçра та пысăк çитĕнÿсем тума ăнăçу сунчĕ. Пирĕн районта ăшă сăмахсене, хисепе тивĕç спортсменсем чылай. Ăмăртусене активлă хутшăнса çитĕнекен ăрăва ырă тĕслĕх кăтартакансене, сывă пурнăç йĕркине йăлана кĕртсе пырас, ăна анлăрах сарас, спорта аталантарас, çамрăксене явăçтарас тĕлĕшпе ĕçлекенсене, район ят-сумне çĕкленĕ спортсменсене, тренерсене район администрацийĕн физкультурăпа спорт пайĕн начальникĕ Сергей Политов Хисеп грамотисемпе тата укçан преми парса чысларĕ. Çак чыса 30 ытла çын тивĕçрĕ. Физкультурник кунĕнче ăмăртусем анлă иртрĕç, спортсменсем мини-футболла, волейболла, шахматла выляса, тĕрлĕ дистанцие чупса ăмăртрĕç. Шел, çак кун вĕсемшĕн «чирлекенсем»-хавхалантаракансем йышлăнах пулмарĕç. Футбол вăййинче малтанах Упнер тата Кив Мĕлĕш ял администрацийĕсен командисем тĕл пулчĕç. Мĕлĕшсем упнерсене 7:4 шутпа çĕнтерчĕç. Унтан футболăн пĕчĕк уйне Вăрнарти хутăш препаратсен завочĕн «Химик» командипе шалти ĕçсен районти пайĕн сотрудникĕсем тухрĕç. Вăйă нихăш команда та пĕр-пĕрне парăнтарайманнипе - 1:1 шутпа - вĕçленчĕ. Пенальти çапни çĕнтерÿçĕне палăртрĕ, химиксем йĕрке хуралçисен хапхине мечĕке сакăр хутчен çапса кĕртрĕç. Финалта «Химикпе» Кив Мĕлĕш команди вылярĕç. Кунта та химиксем хастартарах пулни сисĕнчĕ, вĕсем 3:1 шутпа выляса илчĕç. Тĕрлĕ дистанцие чупса мала тухас текенсем те чылайăн пулчĕç, уйрăмах çамрăксем темиçе ушкăнра та ăмăртрĕç. 100 метра кĕске вăхăтра чупса тухса Алексей Салмин, Саша Емельянов, Денис Григорьев çĕнтерчĕç. 400 метрлă дистанцире чи пысăк хăвăртлăхпа чупакансем Александр Емельянов, Андрей Петров, Алексей Савинов, Дмитрий Герасимов пулчĕç. 1,5 километрлă дистанцие Денис Михеев, Дмитрий Герасимов, Алексей Савинов çăмăллăнах парăнтарчĕç. Хĕрсем хушшинче Галя Павловапа Эльвира Чугунова хастар пулчĕç. Шахматистсен блиц-турнирĕн кăтартăвĕсем çапла: пĕрремĕш вырăна Станислав Мурашкин тухрĕ. Валерий Наумовпа Виссарион Афанасьев иккĕмĕшпе виççĕмĕш вырăнсене йышăнчĕç. Çĕнтерÿçĕсене пурне те Хисеп грамотисемпе наградăларĕç, укçан преми пачĕç. «Ласточка» лагерьте канакансем те хăйсен хушшинче ăмăртусем йĕркелерĕç: тăршшĕне сикрĕç, турник çинче туртăнчĕç, чупрĕç. Вĕсене те призсемпе хавхалантарчĕç, ЧР Патшалăх Канашĕн депутачĕн П.Семеновăн ячĕпе футбол мечĕкĕ, район администрацийĕнчен баскетбол мечĕкĕ парнелерĕç. Стадионта ăмăртусем вĕçленнĕ хыççăн вăрнарсем тăватă автобуспа Шупашкара çул тытрĕç. Шăпах çак кун тĕп хулари «Олимпийский» стадионта Чăваш Ен кубокне çĕнсе илессишĕн футбол вăййисен финалĕ иртрĕ. Пирĕн раойнти «Химик» команда Шупашкарти «СК-Центрпа» вылярĕ. Курма пынисем матч тăршшĕпех хавхалантарни те химиксене пулăшмарĕ Курăнать - кубок шупашкарсен аллинче юлчĕ. Вăрнар тăрăхĕнче çуралса ÿснĕ, халĕ Шупашкарта, Çĕнĕ Шупашкарта пурăнакансен «Туслăх» ентешлĕхĕ «СК-Центрăн» хапхине пĕрремĕш гол тапса кĕртекен валли парне - спорт сумкипе футбол мечĕкĕ- хатĕрленĕ. Ăна «Химик» командăн вăйăçи Алексей Князев илме тивĕçлĕ пулчĕ.