Ялхуçалăх культурисене пуçтарса кĕртесси пуçланнă хыççăн районта кашни çулах ĕç вырăнĕнче çынсемпе инкек пуласси тата пушар тухасси ÿсет. Вырма вăхăтĕнче çын ан вилтĕр тата йывăр ан амантăр тесе хуçалăхсенче тĕллевлĕн ĕçлесе пыраççĕ. Çапла, 100 çын ытларах вăй хуракан ялхуçалăх предприятийĕсемпе организацийĕсенче чылайăшĕн штатĕнче ĕçе сыхлассипе тимлекен специалист пур. Ялхуçалăх культурисене пуçтарса кĕртесси пуçланиччен хуçалăхсенче ĕçри хăрушсăрлăхшăн яваплă специалистсемпе ытти работниксене вĕрентессине йĕркелерĕç. Ку тĕлĕшпе уйрăмах «Гвардеец», «Броневик», «Янгорчино» ялхуçалăх производство кооперативĕсем ырă ята тивĕçлĕ. «Победа», «Знамя», «Хорнзор», «Янгорчино» тата ытти хăшпĕр хуçалăхсенче вырмари кашни ĕçпе уйрăм инструкци туса хатĕрленĕ. Ялхуçалăх культурисене пуçтарса кĕртме тытăнас умĕн кашни хуçалăхрах инструктаж ирттернĕ. Нумай хуçалăхсем комбайнсене вут-çулăм сÿнтермелли япаласемпе (огнетушительсем, хăйăр, шыв тултарнă савăт, кĕççе, кĕреçе), медицина аптечкипе тивĕçтернĕ. Çав хушăрах «Самолет», «Искра», «Юнтапа», «Правда», «Победа» хуçалăхсенче ĕçе сыхлассипе тимлекен специалист çук. Производствăра инкек пулассинчен сыхланас тĕлĕшпе чылай ĕçсем туса ирттеретпĕр пулин те хăшпĕр хуçалăхсемпе организацисенче хăрушсăрлăх техникин правилисене, ĕç дисциплинине пăснине, ĕçе ÿсĕр çынсене явăçтарнине пула производствăра инкек пулнă тĕслĕхсем пĕтмеççĕ, вĕсенче çынсем йывăр аманаççĕ е вилеççĕ. Кăçал, акă, мартăн 14-мĕшĕнче «Новый путь» ялхуçалăх производство кооперативĕнче Г.Степанов каçхи хуралçă электрокăмакапа усă курнă чухне пиçсе кайнă, инкек курнă вырăнтах вилнĕ. Çак уйăхра «Вăрнарти аш-какай комбиначĕ» акционерла уçă общество комбайнерĕ В.Мефодьев «ДОН-1500» уй-хир карапне юсанă чухне жатка айне пулнă, вилмеллех аманнă. Ку тĕслĕхсем ялхуçалăх объекчĕсенче инкек тата пушарсем пуласран сыхланас тĕлĕшпе пысăк çитменлĕхсем пурри çинчен калаççĕ. Ялхуçалăх объекчĕсенче пушар пуласран, производствăри инкексене пула çын вилессинчен тата йывăр аманассинчен сыхланассине вăйлатас тĕлевпе район администрацийĕн ялхуçалăх управленийĕ çапла тума сĕнет: - 100 çын ытларах вăй хуракан кашни ялхуçалăх предприятийĕн штатĕнчех ĕçе сыхлассипе тимлекен специалист пулмалла* - предприятинчи мĕнпур работниксемпе хăрушсăрлăх техникипе тата пушартан сыхланмалли правилăсене пурнăçлассипе черетлĕ тата планпа палăртман инструктажсем ирттермелле* - юсавсăр ялхуçалăх техникипе усă курма чармалла, ĕçленĕ çĕрте эрех-сăра ĕçнине пĕтермелле, ÿсĕр çынсене ĕçрен хăтармалла. Пушар хăрушсăрлăхĕн, ĕç сыхлавĕн правилисене пурнăçланине, тырпулпа ытти ялхуçалăх культурисене вăрласран асăрханине тĕрĕслеме каçхи рейдсем йĕркелемелле. Ĕçленĕ çĕрте ятарлă кану вырăнĕсем пулмалла. Улăм, утă куписем çывăхĕнче, ытти çакăн пек вырăнсенче канассине пĕтермелле. Ялхуçалăх предприятийĕсен ертÿçисен электричество установкисен тата ытти хăрушă производство объекчĕсен юсавлăхне тĕрĕслесех тăрассине, хăрушсăрлăх техникипе хушма инструктажсем ирттерессине йĕркелемелле.