Шкула çĕнĕ вĕренÿ çулне кĕтсе илме хатĕрленĕ вăхăтра ялта никам та аякра тăрса юлмасть. Ку тĕлĕшпе пире «Родина» ялхуçалăх производство кооперативĕ чылай пулăшать. Председательте Юрий Васильевич Кулаевский ĕçленĕ вăхăтра пире кашни çулах самăртма çамрăк вăкăр паратчĕ. Унăн ашĕпе ачасене шкул столовăйĕнче вĕри апат çитернĕ çĕрте усă курнă. Çĕнĕ председатель Андрей Кронидович Кичаев çак ырă йăлана пăсмарĕ, кăçал та пире çамрăк вăкăр уйăрса пачĕ. Шкул пахчинче çĕрулмине колхоз тракторĕпе лартса хăвартăмăр. Çакăншăн Николай Степанович Трофимов тракториста питĕ пысăк тав сăмахĕ калас килет. Ку таранччен пирĕн пушартан сыхланса шыв упрама савăт çукчĕ. Пĕрлешÿллĕ хуçалăх кăçал çак савăта шкула илсе пырса вырнаçтарсах лартрĕ. Çакăншăн Андрей Кронидовича пысăк тав. Правлени членĕсем шкул умĕнче тăракан татса паман ыйтусене хăйсен нуши вырăннех хурса йышăнаççĕ. Хуçалăх радиоузелĕ урлă ашшĕ-амăшĕсем валли лецисем, калаçусем йĕркелетпĕр. Çакă уйрăмах çуллахи вăхăтра пысăк пĕлтерĕшлĕ. Шкулăн хăйĕн транспорт çук. Çавна май автобус кирлĕ чухне яланах пĕрлешÿллĕ хуçалăхран ыйтатпăр. Пирĕн ыйтăва яланах тивĕçтереççĕ. Вĕренсе тухакансен каçне, ытти çакăн пек мероприятисене ирттернĕ чухне колхоз пире кашнинчех апат-çимĕç продукчĕсемпе пулăшать. «Родина» ялхуçалăх производство кооперативĕ вăйлă хуçалăхсен шутне кĕмест. Хăй те укçа-тенкĕ тĕлĕшĕнчен пысăк йывăрлăхсем тÿсет. Анчах илекен мар, паракан пуян, теççĕ. Çавăнпа манăн шкул çинчен манманшăн хуçалăх ертÿçине Андрей Кронидович Кичаева тата тепĕр хут тав сăмахĕ калас килет. Шĕнер Ишек ял администрацийĕн пуçлăхĕ Галина Николаевна Кадыкова та çак сăмахсене тивĕçлĕ. Вĕсемпе, хăй вăхăтĕнче шкултан вĕренсе тухнă çынсемпе, ашшĕ-амăшĕсемпе, общественноçпа малашне те тачă, туслă çыхăну пуласса шанатăп. Пурте пĕрле пулни пире ачасене тĕрĕс воспитани парса çитĕнтерме пулăшать.