Вăрнар поселокĕ Раççейре ирттерекен чи лайăх хула-ял ятсене çĕнсе илессишĕн конкурссене çуллен хутшăнать. Кăçал та вăл çĕнтерÿçĕсен йышне кĕнĕ, Хисеплĕ диплома тивĕçнĕ. Иртнĕ эрнекун Мускавра «Раççейри чи тирпейлĕ хула» конкурс итогĕсене пĕтĕмлетнĕ. Унта Çĕнĕ Шупашкар, Етĕрне хулисемпе пĕрле Вăрнар поселокĕн представителĕсем те хутшăннă. Раççейĕн Патшалăх строительствин председателĕ Николай Кошман поселок администрацийĕн пуçлăхне Василий Львова Вăрнар хуçалăхне лайăх аталантарнăшăн ырă сăмахсем каласа Хисеплĕ диплом панă. Мускав, Санкт-Петербург, Екатеринбург, Калининград хулисемпе пĕрле Вăрнар поселокĕ Раççейре чи тирпейлĕ вырăн ята тепĕр хут çĕнсе илни малашне тата лайăхрах ĕçлеме хавхалантарать. Хамăр пурăнакан тавралăха таса тытни пирĕншĕн вĕт. Ăна тума çав тери хулăн укçа-тенкĕ кирлĕ мар. Чунпа пуян, культурăллă çынсем çавна ăнланаççĕ.