Иртнĕ эрнекун Шупашкарта Раççей ООН-а кĕни 50 çул çитнине халалласа çамрăксем хушшинче “Эпĕ ЮНЕСКО пирки мĕн пĕлетĕп” ятпа ирттернĕ пĕтĕм Раççейри конкурса пĕтĕмлетнĕ, çĕнтерÿçĕсене палăртнă. Конкурсантсен шутĕнче, пĕтĕмпе 1500 ытла çын, шкул ачисем, студентсем, çамрăк ученăйсем пулнă.

Унта хутшăнса Вăрнарти 29-мĕш професси училищинче 22-мĕш ушкăнра вĕренекен Ольга Макарован ĕçĕ чи лайăх 50 ĕç шутне кĕме пултарнă. Уйрăмах палăрнисене РФ Ют çĕршыв ĕçĕсен министерствин Дипломне панă. Тарăн та тĕплĕ хуравсемшĕн çак йышри вунпилĕк çамрăк тата уйрăм парнесене те тивĕçнĕ. О.Макарована РФ Патшалăх Думин депутачĕ П.Семенов магнитофон парса чысланă. Конкурса хутшăнма вĕренекене наука руководителĕ А.С.Матвеев, Е.Е.Селенине мастер тата Е.Н.Приезжева библиотекарь пулăшнă.