Çĕнĕ мелсемпе усă кураççĕ
Ял çыннисен пурнăçĕнче халлĕхе тĕл пулакан тÿнтерле пулăмсенчен хăтăлас тĕллевпе Кÿлхĕрри ял администрацийĕ халиччен усă курман мелсене ĕçе кĕртме тăрăшать. Çак тĕллевпе кăçал администраци çумĕнче общественность тата профилактика канашĕ йĕркеленĕ. Унта ял администрацийĕн пуçлăхĕ Н.Кириллов, ЧР тава тивĕçлĕ учителĕ Л.Федоров пенсионер, ялти шкул директорĕ А.Шоколева, шкул работникĕ Н.Федоров, Калининăри ача сачĕн воспитателĕ Г.Фирсова, «Вурнарыдорстрой» акционер обществин водителĕ Ф.Николаев, ялти клубри художество руководителĕ А.Венедиктова кĕреççĕ. Август уйăхĕнче çĕнĕ канашăн пĕрремĕш ларăвĕ иртнĕ. Унта К.Иванова Н.Ефремов пирки çырса панă хута пăхса тухнă. Лешĕ К.Иванован 24 хурне хăйĕн кил картине хупса 3 кун усранă,хуçи ыйтсан нимĕн те пĕлместĕп, тесе хуравланă. Канаш ларăвĕнче Н.Ефремова ют çын хурĕсене çакăн пек хупса усрани саккуна хирĕçле ĕç пулни çинчен кăтартса хăварнă, урăх кун пек тума юраманни пирки асăрхаттарнă.