«Хорнзор» тата «Янгорчино» ял хуçалăх производство кооперативĕсенче районти выльăх-чĕрлĕх ĕрчетекенсен семинар-канашлăвĕ иртрĕ. Унта хуçалăхсен ертÿçисем, тĕп зоотехникĕсемпе ветеринари врачĕсем, ял администрацийĕсен пуçлăхĕсем хутшăнчĕç. «Хорнзор» ял хуçалăх предприятийĕн председателĕ Ф.Г.Кузьмин тата «Янгорчино» хуçалăх ертÿçи Г.В.Романов хăйсем патĕнче фермăсен çурчĕсене выльăхсене хĕл каçарма мĕнле хатĕрленни  çинчен каласа кăтартрĕç, выльăх-чĕрлĕх продукцийĕ туса илесси еплерех пулса пынипе паллаштарчĕç. Семинар-канашлăва килнисем Хурăнсур Çармăсри тата Çĕрпелти сĕт-çу фермисен витисене кĕрсе курчĕç.

Семинар-канашлăвĕн иккĕмĕш, теориллĕ пайĕ «Янгорчино» хуçалăх правленийĕн ларусен залĕнче иртрĕ. Малтанах район администрацийĕн ял хуçалăх управленийĕн пуçлăхĕ А.И.Ильин сăмах илчĕ, кăçалхи тăхăр уйăхра районта выльăх-чĕрлĕх продукцийĕ туса илессипе еплерех ĕçленине тишкерчĕ, фермăсенче выльăхсене хĕллехи тапхăрта усрама витесене куçарас тата ферма ĕçченĕсем умĕнче хĕллехи уйăхсенче продукци илес тĕлĕшпе тăракан задачăсем çинчен каласа кăтартрĕ. Районти ветеринари станцийĕн пуçлăхĕ Н.Н.Тихонов хуçалăхсенче выльăх-чĕрлĕхе чир-чĕртен сыхласси еплерех пулса пынипе паллаштарчĕ. Ял хуçалăх управленийĕн тĕп экономисчĕ З.А.Игнатьева ферма ĕçченĕсене хĕллехи тапхăрта продукци туса илнĕшĕн мĕнлерех тÿлемелли çинчен каласа кăтартрĕ.