Хуçалăхсенче халĕ выльăхсене уй-хиртен витесене куçарса хĕллехи условисенче усрама тытăнас тапхăр пырать. Чылай чухне çак вăхăтра ĕнесенчен продукци илесси чакать. Апла пулин те кăçал районта сĕт сăвассине пĕлтĕрхи шайрах сыхласа хăварма пултарнă. Иртнĕ эрне вĕçĕнче районĕпе кашни ĕнерен пĕр кунта 6,3 килограмм сĕт суса илнĕ. Ку иртнĕ çулхи çав вăхăтринчен 0,2 килограмм ытларах.

Сĕт сăвассипе «Хорнзор» ял хуçалăх производство кооперативĕнчи ĕне пăхакансем малта пыраççĕ. Вĕсен кулленхи сăвăм 12 килогрампа танлашать. «Абызово» ял хуçалăх предприятийĕнчи дояркăсем куллен 10,91 килограмм сăваççĕ. Çĕрпелсем те пĕр кунта кашни ĕнерен 10 килограмм ытларах продукци илеççĕ. Тăваттăмĕш вырăнта - «Победа» ял хуçалăх производство кооперативĕнчи выльăх пăхакансем. Хирпуçсен кулленхи сăвăм 9,23 килогрампа танлашать. «Знамя», «Урожайная нива» хуçалăхсем те кашни ĕнерен куллен çур пăт ытларах сĕт сăваççĕ.

Анчах та выльăх-чĕрлĕхрен продукци илессишĕн кашни хуçалăхрах çакăн пек тăрăшмаççĕ. Акă, «Агро-инвест» ял хуçалăх продукцийĕнче кулленхи сăвăм 3,94 килограмм кăна. «Самолет», «Искра», Коротков ячĕллĕ, «Новый путь», «Маяк», «Свет», «Родина» хуçалăхсенче, ял хуçалăх техникумĕнче те 4 килограмран çеç иртет. Кĕр мăнтăрĕпе çакăн чухлĕ кăна сĕт сунипе ниепле те килĕшме çук. Асăннă хуçалăхсенчен чылайăшĕнче кăçал выльăх апачĕ хатĕрлессипе çителĕксĕр ĕçлени, çавна май ĕнесене тулăх тăрантарса усраманни çинчен калать çакă.