«Мăрат» ял хуçалăх производство кооперативĕ тата «Чувашская нива» тулли мар яваплă общество ку таранччен çĕрулми, пахчаçимĕçсем хатĕрлесе çĕршыври пысăк хуласене ăсатассипе тимленĕ. Паллă предприниматель Геннадий Петрович Спиридонов пуçарнипе «Мăрат» кооператив малашне çавăнпа пĕрлех уй-хиртен продукци туса илессипе те ĕçлеме тытăнасшăн. Çакăн валли МТС «Яуши» хуçалăхра 50 гектар çĕр илме палăртаççĕ. Уй-хир ĕçĕсене пурнăçлама кооператив урапаллă икĕ МТЗ-82, гусеницăллă пĕр ДТ-75 тракторсем, икĕ ГАЗ-53 автомашина туяннă. Кăкарса ĕçлемелли техника та - плугсемпе сеялкăсем, культиваторсемпе сÿресем - кирлĕ чухлех пур. Халĕ кооператив çуркунне ял хуçалăх культурисене акса-лартса хăварма çĕр хатĕрлесси. Паянхи куна 20 гектар яхăн сухаланă та ĕнтĕ.