Тавах аннесене
Анне, чи ăшă сăмахсем те, чи хаклă парнесем те çителĕксĕр пулĕç Сире тав тума. Чун парса ÿстернĕшĕн, вĕрентнĕшĕн, ятланăшăн сирĕн умăрта ачусем ĕмĕр парăмра. Аннесен пурнăçĕ çăмăл мар пулнине, пирĕншĕн вĕсем çĕрĕпех канăçне çухатнине, куляннине ача чухне ăнлансах каймастпăр çав. Унăн ларса канма вăхăт çуккине те асăрхамастпăр. Ачисен сывлăхĕшĕн тăрăшнине, ăнăçăвĕшĕн савăннине, пурнăçри йăнăшсемшĕн анне чĕри çуннине туймастпăр. Хăв çемьеллĕ пулса ачусене ÿстернĕ чухне тин анне вĕрентсе каланă кашни сăмах аса килет. Кашни амăшĕшĕн хăй ачи чи хакли, чи лайăххи.
Анне кунĕ ячĕпе Сăкăтра пурăнакан Юлия Кузьминична Мижеловăна чĕререн ăшшăн саламлатпăр. Вĕсем мăшăрĕпе Иван Ксенофонтовичпа 10 ача çуратса ÿстернĕ, пурне те пурнăç çулĕ çине тăратнă. Юлия Кузьминична ĕçчен те тирпейлĕ, сăпайлă та кăмăллă çын.