Иртнĕ эрне кун Вăрнарти ача-пăча пултарулăх çуртне районти шкулсенче вĕренекен чи хастар, маттур ачасем пуçтарăнчĕç. Çамрăксен форумĕ икĕ пайпа иртрĕ. Малтанах ачасем умĕнче çак мероприятие йĕркелекен, вĕрентÿ, çамрăксен политикин тата физкультурăпа спорт управленийĕн специалисчĕ В.Прокопьев сăмах илчĕ, вăл çамрăксемпе çыхăннă чылай çивĕч ыйту хускатрĕ.

Форумăн иккĕмĕш пайĕнче вĕренекенсем мастер-классенче ĕçлерĕç. «Малалла ăнтăлакан çĕнтерет» секцие Вăрнарти 2-мĕш вăтам шкулта вĕренекен хĕрачасем - Ольга Волошинапа Ирина Васильева - ертсе пычĕç, пухăннисен тавракурăмне, ăс-хакăлне, пултарулăхне аталантарас тĕлĕшпе чылай конкурс ирттерчĕç.

«Муравейник» секцинче ачасем, Мускаври санитарипе гуманитари академийĕн студенчĕсем Юрий Николаевпа Константин Иголкин йĕркелесе пынипе, спорт вăййисенче вăй-хала çирĕплетрĕç.