Çулталăк вĕçленсе пырать. Çавна май вăл е ку сферăра тимлекенсен хăйсен ĕçне пĕтĕмлетме, малашнехи плансене палăртма вăхăт. Çак тĕллевпех пуçтарăнчĕç те иртнĕ эрне кун социаллă ĕçченсем районти культура çуртне. Канашлу ĕçне хутшăнакансене - ял администрацийĕсен пуçлăхĕсене, социаллă работниксене- малтанах район администрацийĕн ĕç, социаллă пурнăç тата демографи политикин пайĕн пуçлăхĕ Г.Никитин, администраци ĕçĕсене йĕркелесе пырас енĕпе ĕçлекен пай пуçлăхĕ А.Матвеев саламларĕç, ватăсемпе инвалидсене, пĕччен пурăнакансене, социаллă хÿтлĕх кирлĕ ытти çынсене ĕçпе те, сăмахпа та пулăшас çăмăлах мар ĕçре ăнăçу сунчĕç. Семинарта тухса калаçакансен сăмахĕсем те халăха социаллă хÿтлĕхпе тивĕçтересси çинчен пулчĕç.

Районти тĕп больницăн тĕп врачĕ Ольга Казакова больница ĕçĕ-хĕлĕпе туллин паллаштарчĕ. Сывлăх сыхлавĕнче юлашки çулсенче пулса иртнĕ улшăнусем халăха медицина пулăшăвĕ парас ĕçе лайăхлатнине палăртрĕ вăл. Ялсенче çемье врачĕн, пĕтĕмĕшле практика офисĕсене уçни, ĕççыннисем вăхăтне тата укçи-тенкине перекетлесе хăйсен патĕнчех сипленме пултарни çакнах çирĕплетет. Чирлĕ çынсене таса та çутă, хăтлă пÿлĕмсенче йышăнас, паянхи куна тивĕçтерекен медицина технологийĕсемпе сиплес тĕлĕшпе пысăк ĕçсем туса ирттернине те палăртрĕ Ольга Михайловна - больницăн чылай уйрăмĕнче юсав ĕçĕсем пурнăçланă, вĕсем вара Европа шайне тивĕçтереççĕ, хăватлă медицина оборудованисем туяннă тата ыт.те. Медицина пĕр вырăнта тăмасть, вăл кунсерен аталанса пырать, çавăнпа та медперсоналсен квалификацине ÿстересси çивĕч тăрать. Ольга Михайловна каланă тăрăх, медицина ĕçченĕсене вĕрентесси халлĕхе кирлĕ пек пулса пырать.

Аслă Отечественнăй вăрçă участникĕсене, ветеранĕсене, инвалидсене, тыл ĕçченĕсене, тăлăх салтак арăмĕсене тата çăмăллăхпа усă куракан ытти категорири çынсене медицина пулăшăвĕ парасси çинче те чарăнса тăчĕ О.Казакова. Тÿлевсĕр е йÿнĕрех хакпа эмелсемпе тивĕçтересси, шăл протезĕсем лартасси, медицина экспертизи, УЗИ витĕр тухасси енĕпе паянхи кун чăрмавсем çук. 2002 çултанпа район больницин стационарĕнче вăрçă участникĕсене валли ятарлă ултă пÿлĕм уйăрнă, вĕсенче пĕр вăхăтра 18 çын сипленме пултарать. Ку пÿлĕмсене оборудованисемпе çирĕплетнĕ.

Ватă çынсене психологи тĕлĕшĕнчен  пулăшасси - соцработниксен ĕçĕн уйрăлми пайĕ. Кашнинпе пĕр чĕлхе тупма, унăн кăмăл-туйăмне, темпераментне пĕлни, ăнланни вара вĕсен чи паха енĕ. Куç курманнисен районти обществăн председателĕ Г.Скворцов канашлура çак шухăша уçса пачĕ те. Çавăн пекех Григорий Константинович аслă ÿсĕмри çынсен чирĕсем ытларах стресспа çыхăннине палăртрĕ. “Пĕччен пурăнакан ватăсемпе тăтăшрах тĕл пулса чуна уçса калаçни те вĕсене пурнăç çине урăхларах куçпа пăхма, унăн илемĕпе хаваслăхне туйма хистет”,- терĕ вăл.

РФ Песни фончĕн Вăрнар районĕнчи управленийĕн пуçлăхĕ В.Печников пĕлтернĕ тăрăх, Чăваш Республикин Правительствипе Пенси фончĕн килĕшĕвĕпе кăçалхи çул сахал тупăшлă тата пĕччен пурăнакан пенсионерсене 345 пин тенкĕлĕх адреслă пулăшу панă, çав шутран 16 пинне - Аслă Çĕнтерÿ кунĕ ячĕпе, 27 пинне - ватăсен, 8 пинне - инвалидсен кунĕпе. Çавăн пекех газ кĕртме 294 пин тенкĕ парса пулăшнă. Пенси тата пособисем енĕпе парăм çук. Кăçалхи тăхăр уйăхри ĕç кăтартăвĕсемпе паллаштарнипе пĕрлех управлени пуçлăхĕ пенси реформинчи çĕнĕлĕхсем çинчен те ыйту хускатрĕ.

Аслă ÿсĕмри çынсене, инвалидсене социаллă пулăшу парассипе ĕçлекен районти центр ĕçĕ-хĕлĕ пирки В.Павлов каласа кăтартрĕ. Хăйĕн сăмахĕнче вăл центрăн специалисчĕсемпе соцработниксен тăрăшулăхне пула ватăсене килти пулăшу парасси, пурнăç условийĕсене тĕрĕслесе лайăхлатма пулăшасси çулсерен çÿллĕрех шая çĕкленсе пынине палăртрĕ.

Ватта сума сăвасси, хисеплесси - общество тивĕçĕ. Пенсионерсене, пĕччен пурăнакан ватăсене пулăшни - сăваплă ĕç. Семинарта тухса калаçнă Çавалкас, Ярмушка тата Уравăш ял администрацийĕсен пуçлăхĕсем П.Краснов, Г.Сорокин тата В.Абакумова хăйсем патĕнче çак категорири çынсене яланах пулăшма хатĕррине пĕлтерчĕç.

Çулсем ватлăх енне кайсан савăнмалли сахалтарах-çке. Умри малашлăх та хăратать. Вăйĕ чакса, хавшаса пырать. Пĕчченлĕх те шиклентерет. Упа пĕччен пурăнаять, теççĕ. Этем вара кампа та пулин калаçса чуна пусармасăр пурăнаймасть, пĕчченлĕхе çĕнтерме хал çитереймест. Çакна шута илсех администраци территорийĕсенче, акă, ватăсем патне кайса çÿрессине, тĕл пулусем йĕркелессине йăлана кĕртнĕ. Шкул ачисем те манмаççĕ вĕсене, килти хăшпĕр ĕçсене туса пулăшаççĕ. Администраци специалисчĕсем, клуб ĕçченĕсем, медработниксемпе учительсем те аякра юлмаççĕ. Ырă сăмах та ватăсен кун-çулне тăсма пулăшать-çке, вăй-хăвать парать.

Семинарта çавăн пекех районти ветерансен обществин председателĕ А.Селенин, Вăрнарти хутăш препаратсен завочĕн директор çумĕ Е.Захаров сăмах илчĕç. Хыççăн социаллă ĕçсченсем çавра сĕтел хушшине ларса пĕр-пĕрин ĕç опычĕпе паллашрĕç.