Халĕ Кÿлхĕрринче пĕрлешÿллĕ хуçалăх çук. «Вурнарыдорстрой» акционер обществин хушма хуçалăхĕ пулса тăнă хыççăн кунта обществăлла выльăх-чĕрлĕх пĕр пуç та юлман, фермăсем хупăннă, витесене йăлтах çĕмĕрсе-салатса пĕтернĕ. Çав вăхăтрах ял çыннисем хăйсен килĕсенче выльăх ытларах та ытларах усраççĕ. Пĕлтĕр мăйракаллă шултра выльăхсен хисепĕ 229 пуç пулнă. Кăçал тăхăр уйăхра 259 пуçа çитнĕ. Çынсене выльăх усрама лайăхрах майсем туса парас тĕллевпе тата халăх ыйтнипе ял администрацийĕ иртнĕ çул ялта ĕнесене искусствăлла майпа пĕтĕлентерекен пункт уçнă. Унта çав вăхăтра ĕçсĕр пулнă Михаил Ржанов вăй хурать.