Çитĕнекен ăрăва чĕлĕм туртассинчен асăрхаттарасси - вĕрентÿпе культура учрежденийĕсенче ĕçлекенсемшĕн кулленхи çивĕч ыйтусенчен пĕри. Халĕ Чăваш Республикин Президенчĕн Н.Федоровăн халăхăн сывлăхне сиенлĕ витĕм кÿнине чакарассипе, никотинран пăхăнса тăнин шайне пĕчĕклетессипе, сывă пурнăç йĕркине анлăрах явтарассипе чĕнсе каланă «Табак туртнин сиенĕ пирки асăрхаттарасси çинчен» указĕ вĕсен ĕçне татах та вăйлатма хистет.

Санарпуçĕнчи ял библиотекарĕсен ырă пуçарăвĕпе, акă, вырăнти шкулта нумаях пулмасть тематикăллă тĕл пулу иртнĕ. Унăн тĕп хăнисем - 6-9 классенче вĕренекенсем. Çак çулсенчи ачасем сиенлĕ йăласене уйрăмах хăвăрт хăнăхма пултараççĕ. Çамрăк организм вара усал «çимĕçсем» тĕлĕшпе питĕ сисĕмлĕ, ача хăй сисмесĕрех  çак тĕпсĕр авăра çакланма пултарать.

Чĕлĕм туртни сывлăха хавшатни, çын ĕмĕрне кĕскетни, тĕрлĕ чирсене пуçарма пуçлани çинчен Санарпуçĕнчи медицина пункчĕн фельдшерĕ Раиса Капралова питĕ ĕнентермелле каласа панă. Библиотека заведующийĕ Маргарита Горшкова ЧР Президенчĕн табак туртассинчен асăрхаттарасси çинчен калакан указĕпе тĕплĕн паллаштарнă.