Раштавăн 16-мĕшĕнче Мăн Явăшри вăтам шкулта Сывлăх кунĕ иртрĕ. Чи малтанах физкультура учителĕ А.А.Степанов 6-мĕш класра уçă урок ирттерчĕ. Ачасем гимнастика снарячĕсем çинче тĕрлĕ енлĕн тупăшрĕç. Ун хыççăн 2-4 классенче вĕренекенсем “Хаваслă стартсем” конкурса хутшăнчĕç. Мечĕке карçинккана ывăтмалла-и, хăвăртрах чупса килмелле-и, скакалкăпа сикмелле-и - 4-мĕш класс ачисене çитекен пулмарĕ. “Сывă юлатпăр-и;” конкурс ăмăртура пурин кăмăлне те çĕклерĕ. Вăййа тĕплĕн хатĕрленĕ ОБЖ учителĕ Л.И.Иванов. Унта 9, 10, 11 класс ачисем хутшăнчĕç. Кашни тапхăрта уйрăм çĕнтерÿçĕсем пулчĕç пулин те 11-мĕш класра вĕренекенсен туслă команди “Чи пултаруллисем” ята çĕнсе илчĕç.

Раштавăн 14-18-мĕшĕсенче шкулта вырăс чĕлхипе литература эрни иртрĕ. Программа çав тери пуян пулчĕ: “Хĕрлĕ шĕлепке” юмах, “Шĕлепкесен тытăçăвĕ”, “Вырăс чейĕ” литература монтажĕ, С.Есенина халалланă уçă урок, театр викторини, 7, 8, 9 классем хушшинче хаваслисемпе тавçăруллисен каçĕ.