Нумаях пулмасть районта Аслă Çĕнтерĕвĕн 60 çулхи юбилейне халалланă “Чăваш ен чечекĕсем” фестивалĕн зонăри конкурсĕсем иртрĕç. Фестиваль вĕрентÿ, культура учрежденийĕсенчи ача-пăча пултарулăхĕн 60 коллективне пуçтарчĕ. Пĕрремĕш тур Вăрнарти, иккĕмĕшĕ Калининăри культура çурчĕсенче иртрĕ.

Юрă-ташă, литературăпа музыка композицийĕсем, вăрçă çулĕсенчи, эстрада, халăх юррисем, çар ташшисем... - тĕрлĕ жанрлă номерсемпе тухрĕç ачасем сцена çине. Хапăсри вăтам шкулти кĕçĕн классенчи трио “Айушка”, Пăртасри вăтам шкулти Татьянапа Анастасия Кондратьевасем “Аслă аппа” юррисемпе тыткăнларĕç. Вăрнарти ача-пăча пултарулăх çурчĕн хореографи ушкăнĕ “Палуба çинче”, “Хĕрсен” тата “Матрÿшке” ташшисене çÿллĕ шайра лартрĕ. Поселокри 2-мĕш вăтам шкулти ачасен ташши те куракансемпе жюрине пĕр сăмахсăрах килĕшрĕ.

Иккĕмĕш турта Калининăри тата Кĕçĕн Кипекри вăтам шкулта вĕренекенсем, Калининăри культура çуртĕн солисчĕ А.Волков палăрчĕç.