Çут çанталăкпа этем пĕр-пĕринпе тачă çыхăннă. Çĕр мĕн чухлĕ пулăхлăрах, сиплĕрех, çын пурнăçĕ çавăн чухлĕ тулăхрах та пуянрах. Пирĕн тата çут çанталăкăн пуласлăхĕ чылай чухне хамăртан килет. Çавăнпа та çĕр-аннемĕр пуянлăхне упрасси, тăван тавралăха тирпей-илем кĕртесси кашнин тивĕçĕ пулмалла.

Октябрĕн 8-мĕшĕнче районта Йывăç кунĕ иртрĕ. Унта 3700 çын – предприяти-организацисенче, культура, сывлăх, вĕрентÿ учрежденийĕсенче, поселок тата ял администрацийĕсенче вăй хуракансем, шкулта вĕренекенсем – хутшăннă. Çак кун 8 гектар çинче пурĕ 80 пин те 200 йывăç-тĕм лартса хăварнă. Районта çавăн пекех унччен лартнă  парксемпе скверсене, аллейăсене çĕнетес тата тирпейлес тĕлĕшпе те ĕçленĕ, çуркунне урамсенче, çул хĕррисенче курăк акма газонсем хатĕрленĕ.