«Вăрнарсен «Туслăх» ентешлĕхĕ» обществăлла организаци правленине анчахрах çĕнетсе вăйлатнă хыççăн Шупашкарта тата Çĕнĕ Шупашкарта пурăнакан ентешсем Вăрнар тăрăхĕпе тачăрах çыхăнса ĕçлеме пикенни яр-уççăн сисĕнет. Правлени председателĕ Чăваш ял хуçалăх академийĕн ректорĕ Н.К.Кириллов малашне алла-аллăн тытăнса, пĕр-пĕрне пулăшса вăй хума тĕллев тытнине палăртать.

Анчахрах Вăрнара правлени председателĕн пĕрремĕш заместителĕ Г.Е.Бурмистров ертсе пынипе ентешсен ушкăнĕ килнĕ. Шупашкар хăнисем Вăрнар тăрăхĕнчи паллă çынна – Валерий Петрович Наумова – 65 çул тултарнă ятпа хĕрÿллĕн саламланă, парнепе чысланă.

В.П.Наумова районта пурте пĕлеççĕ. Партипе совет работникĕ. Милицин отставкăри майорĕ. 1991-1996 çулсенче Вăрнар район администрацийĕн пуçлăхĕнче ĕçленĕ. Шашка енĕпе СССР спорт мастерĕ.