Вăхăт питĕ хăвăрт шăвать. Ачасем тин кăна каникула кайрĕç пек, акă, çĕнĕ вĕренÿ çулĕ те çывхарса çитрĕ. Çулла тăршшĕпе каннă, вăй-хал пухнăскерсем каллех парттăсем хушшине пĕлÿ пухма ларĕç, алла ручка-кăранташ тытĕç. Палăртмалла, усăсăр ирттермерĕç çуллахи вăхăта ачасем. Кашни шкултах сывлăха çирĕплетмелли, ĕç лагерĕсем йĕркеленĕ. Хĕл хырăмĕ пысăк, теççĕ. Çакна ăнланса ачасемпе çамрăксем шкул пахчисенче вăй хучĕç, пахча-çимĕç ÿстерчĕç. Ку кăна та мар – шкула çĕнĕ вĕренÿ çулне хатĕрлессипе, ăна тирпей-илем кĕртессипе те сахал мар тăрăшрĕç.

Вăрнарти 2-мĕш шкулта вĕренекенсем те ĕç лагерьне çăвĕпех çÿрерĕç. Вăл виçĕ звенопа ĕçлерĕ. Тĕрлĕ ÿсĕмри ачасем çуллахи уйăхсенче пахча-çимĕç çитĕнтерессипе тимлерĕç, вак-тĕвек юсав ĕçĕсем пурнăçларĕç. Вăрнарти хутăш препаратсен завочĕн территорийĕ тавралла çÿп-çапа тасатса тирпей-илем кĕртрĕç, поселокри ĕçсенчен те аякра юлмарĕç. Нумаях пулмасть, Вăрнарти 2-мĕш шкулти çамрăксен ĕç лагерĕ районти конкурсра мала тухни паллă пулчĕ. Иккĕмĕшсем вырăнта – шĕнерсем. Çĕнтерÿçĕ Ятне тивĕçнĕ Вăрнарти 2-мĕш шкул республикăри конкурсра район чысне хÿтĕлĕ.