Вăрнарти 2-мĕш вăтам шкулта иртнĕ ашшĕ-амăшĕсен черетлĕ пухăвĕнче çак ыйту уйрăмах çивĕч тухса тăчĕ. Шкул директорĕ Маргарита Клементьевна Матвеева пĕлтернĕ тăрăх, социаллă страховани фончĕ урлă кăçал шкула 140 ача валли укçа-тенкĕ  уйăрнă. Ачасен шутне илсен, çакă паллах сахал, çавăнпа та шкул çумĕнчи лагерьте чи малтанах тупăш сахал илекен, йышлă, тулли мар çемьесенчи ачасем канĕç. Апатлану валли уйăрнă укçа кашни ача пуçне кунсерен 39 тенкĕпе танлашать.

Шкул ĕçне йĕркелесе пыракан Канашăн (ăна кăçалхи вĕренÿ çулĕнчен йĕркеленĕ) председателĕ Е.Захаров ачасен канăвне йĕркелессипе пысăк пулăшу пама пулчĕ. Укçа-тенкĕ тĕлĕшĕнчен çирĕплетни çеç мар, каникул вăхăтĕнче ку шкулта вĕренекенсемшĕн «Химик» стадионпа физкультурăпа спорт комплексĕн те, хутăш препаратсен завочĕн актовăй залĕн алăкĕсем те яланах уçă пулĕç.

Асăннă шкул ашшĕ-амăшĕсемпе вĕрентекенсем хушшинчи çыхăнăва кулленех çирĕплетсе пыма тăрăшать. Вĕрентÿ ĕçне çÿллĕрех шая çĕклес, пĕлÿ илме тата аталанма тивĕçлĕ условисем йĕркелес тĕлĕшпе, паллах, пĕрлехи ĕçе нимĕн те çитмест. Шкул тĕплĕ юсав ĕçĕсемшĕн чăнахах «тунсăхлать». Паллах çутă шанчăк ку енĕпе ĕмĕтсене татмасть – пĕр миллион тенкĕлĕх гранта выляса илсен тем пекехчĕ.

Шкул ĕçне ашшĕ-амăшĕсене, общественноçа явăçтарнин ырă енĕсене кăна палăртмалла. Вĕсем – педагогсен опытне хаклаканĕсем çеç мар, тĕрлĕ ыйтусене татса пама пулăшаканĕсем те. Анчах ку ĕçе туллин епле пурнăçласа пымалла-ха; Сăмах майăн каласан çак ыйтăва шкулăн педагогика канашĕнче те малти вырăна кăларнă. Ĕçлĕ вăйă евĕр йĕркеленĕ калаçура вĕрентекенсем пĕлÿ параслăх тата классенчи дисциплина шайĕ мĕнле пулнине тишкернĕ. Ашшĕ-амăшĕпе вĕренекен, вĕренекенпе учитель хушшинчи ăнланусăрлăх мĕн патне илсе çитернине тĕпченĕ.

Ашшĕ-амăшсен пухăвĕ ытти ыйтусемпе те тулăх пулчĕ – вĕренекенсене тĕрлĕ кружок-секцисене явăçтарасси, вĕри апат çитересси, патшалăхăн пĕрлехи экзаменсем  тата ыт.те. Вĕсен хуравĕсене тупма вĕрентÿпе çамрăксен политикин пайĕн ĕçченĕ Е.И.Григорьева, ача-пăча пултарулăх çурчĕн методисчĕ М.В.Сурмина, шкул директорĕ М.К.Матвеева пулăшрĕç.