Çут çанталăк тусĕсем

Ачасене  мĕн пĕчĕкренех хамăр пурăнакан вырăна тирпей-илем кÿме, тăван тавралăха симĕслентерме, çĕр эрозийĕпе кĕрешме вĕрентесси - шкулăн тивĕçĕ. Çакна Хапăсри вăтам шкулта вĕрентекенсем яланах асра тытаççĕ, çамрăк ăрăва тивĕçлĕ воспитани парассишĕн вăй-халне шеллемеççĕ. Вĕсем пĕлтерĕшлĕ ĕçсене пурнăçлама спонсорсене те явăçтарма тăрăшаççĕ. Сăмахран, Валерий Эрикович Кузнецов предприниматель Йывăç кунне ирттерме шкул валли Сĕнтĕрвăрринчи вăрман хуçалăхĕнчен 450 йывăç-тĕм туяннă. Симĕс хунавсене вĕренекенсем пĕлÿ çурчĕн стадионĕ тавра виçĕ ретпе лартнă.

«Юмахра» юмах кăтартнă

 Ыр кăмăллăх эрнинче вĕрентекенсем класс тулашĕнче чылай мероприяти йĕркеленĕ. Ака уйăхĕн 25-мĕшĕнче Людмила Александровна Бойкова ертсе пыракан пукане театрĕн пĕчĕк артисчĕсем Хапăсри «Юмах» ача-пăча садĕнче пулнă. Вĕсем шкул çулне çитменнисем умĕнче «Тилĕ туспа мулкач тус» юмах лартса панă. Ачасем ăна кăсăклансах пăхнă. Геройсен кашни хусканăвне сăнанă. Юмахри сăнарсене иккĕмĕш класра вĕренекенсем – Вера Петухова, Элла Галкина, Филипп Почемкин, Юра Максимов, Илья Ильдуганов, Снежана Шашкина - питĕ ăста калăпланă.  Валя Крючкова вара юмахçă пулнă.

Мероприяти вĕçленсен Людмила Александровна пĕчĕккисене пукане театрĕн ĕçĕ-хĕлĕпе паллаштарнă. «Юмах» ача-пăча сачĕн заведующийĕ Н. Арбузова шкул ачисене тав туса  вĕсене хăйсем патне тата чĕннĕ.

Шкул ачисем - сывă пурнăç йĕркишĕн