Тунă çитĕнÿ çинче кăна чарăнса тăмалла мар
Аталанăвăн эффективлă çулĕсен яланхи шыравĕнче пулмалла... Н.Федоров Президентăн çак сăмахĕсем вĕрентÿ ĕçченĕсемшĕн тĕп девиз вырăнĕнче пулма тивĕç. Çулсерен педагогсен августри канашне хутшăннă май республика пуçлăхĕ вĕрентекенсем умне çирĕп задачăсем лартать: шкулăн ачасене тĕрлĕ енлĕ аталаннă, пуян ăс-хакăллă, кăмăл-сипетлă, тупăшаслăх вăйăллĕ ÿсме пулăшмалла...
Вĕрентĕвĕн çак тĕп критерийĕсене районти педагогсем таса чунпа пурнăçа кĕртсе пыни куçкĕретех. Акă çĕнĕ вĕренÿ çулĕ умĕнхи конференцире чи хастаррисемпе кăтартуллă ĕçлекенсем кăçал та тĕрлĕ шайри наградăсене тивĕçрĕç. Паллах, чи малтанах грант илнĕ шкулсене асăнмалла. Халăха ĕçпе тивĕçтерес нĕпе ĕçлекен патшалăх службин республикăри ертÿçин заместителĕ В.Журавлева Вăрнарти 2-мĕш тата Ярмушкари вăтам шкул директорĕсене М.Матвеевапа Е.Фролова Раççей Президенчĕн грантне илнине çирĕплетекен Дипломсене панă май, ку вĕрентÿ учрежденийĕсем суйласа илнĕ аталану стратегийĕ ыттисемшĕн те тĕслĕх пулмаллине палăртрĕ. Чыса çавăн пекех республика Президенчĕн грантне илнĕ Санарпуçпа Аçăмçырминчи вăтам шкулсен директорĕсем С.Максимовапа В.Ильин та тивĕçрĕç.
Район администрацийĕн пуçлăхĕн грантне çирĕплетни те шкулсен тупăшаслăх вăйне ÿстерчĕ. Кăçал ăна çÿлерех асăннă шкулсенчен пач япăх мар ĕçлекен Кÿстÿмĕрти вăтам шкул тивĕçрĕ. Ларура ун директорне те В.Аршуткина грамотăпа чысларĕç.
Чăваш Республикин Вĕрентÿпе çамрăксен политикин министерствин грамотисене виççĕн тивĕçрĕç: С.П.Максимова тата Т.А.Петрова – Санарпуçпа Вăрман Кипекри шкул директорĕсем, А.М.Павлов – Калининăри вăтам шкул учителĕ.