Район администрацийĕн канашлу залĕнче Раççей гимнĕ мăнаçлăн янăрать. Кунта пухăннисемшĕн ку кĕвĕ паянхи кун чун-чĕрере уйрăмах ырă туйăмсем çуратрĕ. Çапла пулмасăр, кунта ларакансенчен вуннăн - ют çĕр шывсенчен куçса килнисем – Раççей гражданинĕн паспорчĕсене илме тивĕçрĕç. Ют çĕр-çыв гражданинĕсем шутланнă пулин те, чылайăшĕ вĕсенчен Чăваш çĕрĕ çинчех, хăшĕ-пĕрисем Вăрнар тăрăхĕнчех çуралса ÿснĕ, шкултан вĕренсе тухнă, аслă шкулсенче е вăтам вĕрентÿ учрежденийĕсенче пĕр-пĕр специальносте алла илсе ун чухнехи Совет Союзĕн анлăшĕнче саланнă. Тахçан темиçе çĕршыва пĕрлештернĕ хăватлă союз аркансан вĕсем пачах урăх патшалăх гражданинĕсем пулса тăнă. Паянхи политика лару-тăрăвне пĕлетпĕр, чылай юлташлă çĕршывсенче вырăссем хăйсен вырăнне тупаймарĕç. Тепĕр çĕрте вара лару-тăру питĕ кăткăс, вĕçĕм х ирĕçтăрусем пыраççĕ. Çавна майРаççейрен тухнисем Тăван çĕр-шыв еннеллех туртăнаççĕ, кунтах тĕпленсе çурт-йĕр çавăрма тĕв тытаççĕ. Телее, çакнашкал кăмăллă çынсене патшалăх хирĕç утăм туни, Раççей гражданинĕн статусне илмелли вăхăта малтанхинчен чакарни пысăк çăмăллăхсем туса пачĕ.

Çĕнĕ паспортсене, халĕ ĕнтĕ Раççей Федерацийĕн гражданĕсене Федераллă миграци службин Чăваш республикинчи управленийĕн пуçлăхĕ С.Иванов тата район администрацийĕн пуçлăхĕ А.Кузьмин пачĕç.

С.Иванов паспорт илекенсене саламланă май, çĕршыв конституцийĕнче, саккунлăхĕнче çырнине пăхăнса гражданин тивĕçĕсене чи малти вырăна кăларса пурăнма сунчĕ. «Эсир халĕ пирĕн Тăван çĕр-шывăмăрăн ытти гражданĕсемпе танах пĕр пек праваллă. Сирĕн ĕçлеме, канма, суйлавсенче сасăлама тата ыттине, саккунпа килĕшÿлĕн, ирĕк пур. Тăван Чăваш ен район аталанăвне палăрмалла тÿпе хывма тăрăшăр. Хăвăр ĕçпе çĕршыва юрăхлă пулăр»,- терĕ район администрацийĕн пуçлăхĕ А.Кузьмин.

Çĕнĕ паспорт хуçисем Раççей гражданинĕн ятне тивĕçнĕшĕн савăннине пытармарĕç, шаннă тивĕçе  чăна кăларма, хăйсен ĕçĕ-хĕлĕпе çĕр-шыв пуласлăхне туптама хутшăнма шантарчĕç.