«Агропромышленность комплексĕн аталанăвĕ» наци проектне пурнăçа кĕртес тесен хуçалăх ертÿçисен хытах тăрăшмалла: выльăхсен хисепне ÿстермелле, витесене çĕнетсе улăштармалла, хĕл валли çителĕклĕ апат хатĕрлемелле, акмалли-лартмалли культурăсен уйĕсене пысăклатмалла, çынсене ĕçлеме лайăх условисем туса памалла тата ыттисем те. Çапла, малашлăхăн çирĕп никĕсне хывма пĕрре те çăмăл мар. Анчах та йывăрлăхсем умĕнче пуçа усманни, тăван хуçалăха, яла аталантарма тăрăшни шăпах çитĕнÿ тума пулăшать.

Çĕртме уйăхĕнче «Кольцовка» агрофирмăра «Хĕллехи тапхăрта выльăх-чĕрлĕх отраслĕнче мĕнле ĕçленине пĕтĕмлетесси тата выльăхсене кĕтÿре çÿретнĕ вăхăтра пурнăçламалли тĕллевсем» темăпа семинар-канашлу иртнĕччĕ. Унта В.Михайлов генеральнăй директор çапла каларĕ:

- Халĕ агрофирмăра 80 пуç ĕне шутланать. Выльăх-чĕрлĕх продукцине ытларах туса илсе ĕç укçине ÿстерме ĕнесен хисепне 200-250 пуçа çитерме палăртатпăр.

Валерий Семенович каланă сăмаха çилпе вĕçтермерĕ. Умри тĕллеве пурнăçлама агрофирмăра икĕ уйăхра ĕнесен йышне 35 пуç ÿстерме пултарнă. Халĕ кульцавсем кунне 115 ĕнерен 1251 килограмм сĕт суса илеççĕ. «Кольцовкăра» сыснасем ĕрчетессипе те тимлеççĕ. Çурла уйăхĕн 1-мĕшĕ тĕлне вĕсен хисепĕ 323 пуç пулнă пулсан, çак вăхăта – 455 пуç. В.Михайлов каланă тăрăх, агрофирмăра сыснасен йышне пысăклатассипе малалла ĕçлĕç. Паллах, укçа-тенкĕ те сахал мар кирлĕ. Çавăнпа агрофирма «Россельхозбанкпа» тачă çыхăну тытать. Вăл кăçал 24300 пин тенкĕлĕх кивçен укçа илме çак акционерсен уçă обществипе килĕшÿ тунă. Кредитпа сысна фермине çĕнетсе улăштарчĕç.