Ĕç опычĕпе паллашатпăр
Районти шкулсенче вĕрентекенсем пĕр-пĕрин ĕç опычĕпе паллашасси юлашки çулсенче анлă сарăлса пырать. Информатика предметне ертсе пыракансем анчахрах Çĕрпелти вăтам шкула пуçтарăнчĕç. Информатика учителĕ Т.Н. Миронова 8-мĕш класра вĕренекенсемпе уçă урок ирттерчĕ. Урок тĕлĕнмелле пысăк ăсталăхпа иртрĕ. Традицие кĕмен эстафета-урок пурне те килĕшрĕ. Ачасем информатика предметне юратса вĕренни тÿрех курăнчĕ. Çак предмета кăçалтан кăна ăса хываççĕ пулин те вĕсем тĕрлĕ редакторсемпе ăста ĕçлеççĕ. Урок пĕтнĕ хыççăн та калаçу вăраха тăсăлчĕ. Информатиксем урока пысăка хурса хакларĕç, çакăн пек интереслĕ уроксем ирттерни ачасен тавракурăмне ÿстернине палăртрĕç.