Ăмăртусенче тупăшрĕç
Çĕршыв хÿтĕлевçисен кунне халалласа пур çĕрте те савăнăçлă уяв каçĕсем, утренниксем, спорт ăмартăвĕсем харăсах иртрĕç - уяв мероприятийĕсене хутшăнмасăр никам та юлмарĕ. Çак кун шкулсемпе ача сачĕсенче, предприяти-организацисенче те çынлăхăн черченкĕ пайĕ хÿтĕлевçĕсене - пĕчĕк каччăсене те, маттур яшсене те, патвар арçынсене те - праçник ячĕпе ăшшăн саламласа чысларĕ.
Калининăри психикăпа неврологи интернатĕнче сипленекен-пурăнакансемшĕн те çак кун нумайлăха асра юлĕ. Сипленекенсен пĕр енлĕ пурнăçне хаваслăх, илем кĕртес, вĕсене кăсăклантарас тĕллевпе ятарласа концертпа конкурс программине хатĕрленĕ. Ăмăртăва хутшăнакансем, паллах - интернатра пурăнакан яшсем. Тĕрлĕ тĕслĕ тупăшусенче хăйсен вăй-халне тата тавçăрулăха кăтартма тиврĕ весен. Нихăшĕ те пĕр-пĕринчен юлас темерĕ, хăйсене лайăх енчен кăна кăтартма тăрăшрĕ.
Конкурсантсем армрестлинг тупăшăвĕнче алă вăйĕсене виçрĕç, вĕрен туртса ăмăртрĕç. Тепĕр конкурс та - «Вăй пур пулсан, ăс кирлĕ мар» ятлăскер - интереслĕ иртрĕ. Кĕвĕ çеммипе каччăсем хĕрсене алă çинче йăтса тăчĕç - чи вăйли, паллах, çĕнтерÿçĕ пулса тăчĕ.
Уявра концерт программишĕн яваплисем вара хĕрсем пулчĕç. Вĕсем тантăшĕсене юрă-ташĕсемпе савăнтарчĕç, вăйăсем выляттарчĕç. Конкурссемпе илемлĕ пултарулăх номерĕсем вĕçленсен те часах саланмарĕç-ха пухăннисем - уяв хаваслă дискотекăпа тăсăлчĕ.