Шупашкартан килнĕ студентсене чи малтан аш-какай комбиначĕн актовăй залне пуçтарчĕç. Ю.Попов генеральнăй директор предприятин историйĕпе, ĕçĕ-хĕлĕпе паллаштарчĕ. Кашни утăма пĕлсе пуссан  ял хуçалăхĕнче тупăшлă ĕçлеме май пуррине çирĕплетрĕ. Райадминистрацин ял хуçалăхĕпе экологи пайĕн пуçлăхĕ С.Павлов сăмах илнĕ май район агропромышленность комплексĕн аталанăвĕ çинчен каласа пачĕ, паян тесен паян Вăрнар енчи хуçалăхсене 8 агроном, 5 зоотехник, 4 тĕп инженер кирлине пĕлтерчĕ.  Студентсем ял хуçалăх специалисчĕн ĕç укçи мĕн чухлĕ пулнипе кăсăкланчĕç. «Лайăх, ăста кадрсене вунă пинрен кая тÿлеместĕп», - терĕ Юрий Алексеевич. - Ют çĕртре пилĕк авиччен хăвăр çуралнă вырăнта ĕçлĕр. Вăхăчĕпе ячĕ-сумĕ те пулĕ.

Генеральнăй директор аш-какай комбинатĕнчи чăн-чăн ăстасем мĕнле ĕçленине пăхма пулас специалистсене юсаса çĕнетнĕ, çĕнĕ йышши  оборудовани вырнаçтарнă цехсене чĕнчĕ. Кунта студентсем кăлпасси, пельмень, консервăсем, çурма фабрикатсем, деликатессем мĕнле хатĕрленипе курчĕç, комбинатра вăй хуракансем экологи енчен таса продукци кăна кăларнине ĕненчĕç. Ял хуçалăх академийĕнче ăс пухакансене предприятин столовăйĕнче техĕмлĕ апат-çимĕçпе сăйларĕç. «Малашне Вăрнар кăлпассине кăна туянăпăр!» - хавасланса калаçрĕç пĕри те тепри. «Пĕр курсра вĕренекенсем тăван районти  предприятире кăларакан продукцин пахалăхне пысăка хурса хакланишĕн питĕ хĕпĕртетĕп, пĕлтерчĕ биотехнологи факультетĕнче вĕренекен Э.Егорова.

Аш-какай комбинатĕнче производство калăпăшне ÿстерсех пыраççĕ. Халĕ кунта 200 тĕслĕ тавар туса кăлараççĕ. Продукцие вырнаçтарасси пуçа ыраттармасть. Таса та  пысăк пахалăхлăскерне çĕршывăн тĕрлĕ регионĕсенче хапăлласах туянаççĕ. Ахальтен мар 2006 çулта агропромышленность комплексĕнче мĕнле ĕçленине пĕтĕмлетнĕ хыççăн «Вăрнарти аш-какай комбиначĕ» акционерсен уçă обществи республикăри чи лайăх 100 ял хуçалăх предприятин йышне кĕнĕ, экономика ăмăртăвĕнче виççĕмĕш вырăн йышăннă. Пĕлтĕр вара Мускавра иртнĕ «Ылтăн кĕркунне-2007» Пĕтĕм Раççейри агропромышленность куравĕнче 4 ылтăн медале тивĕçнĕ.

Цехсенчен тухсан студентсем агрохолдингăн машинăпа трактор паркĕнче пулчĕç, хăватлă техникăпа паллашрĕç.