Васкакан вакка сикнĕ
Çуркунне çитнĕ май çулсем юртан тасалма тытăнчĕç кăна, водительсем хăйсене ирĕклĕ туйма - пысăк хăвăртлăхпа çÿреме - пуçларĕç. Çавна май çул-йĕр правилисене пăсакансене, çав шутра хăвăртлăх режимне ÿстерекенсене те, тупса палăртас тĕллевпе ГИБДД уйрăмĕ кунсерен автоçулсем çинче тĕрĕслевсем ирттерет. Шутласа пăхăр-ха: районти çулсем çинче çырăнакан инкексен 30 проценчĕ шăпах та çил пек вĕçтерсе çÿрекен водительсен айăпĕпе пулса иртет-çке. Каçхи тĕттĕм вăхăтра хăвăртлăха ÿстерни уйрăмах хăрушă.
Кăçалхи мартăн 5-мĕшĕнче акă, ГИБДД уйрăмĕн сотрудникĕсем «Хăвăртлăх» ятпа ирттерекен рейда тухрĕç. Ку тĕрĕслев вăхăтĕнче кăна хăвăртлăх режимне пăснă 30 водителе чарнă. Сăмах май, çул-йĕр правилисен çак пунктне пăхăнманшăн 100 тенкĕрен пуçласа штраф хураççĕ тата транспорт хатĕрĕпе çÿреме ирĕк паракан праваран 4-6 уйăхлăха хăтарма пултараççĕ.
Мартăн 14-мĕшĕнче иртнĕ «Техника тĕрĕслевĕ» рейд вăхăтĕнче те çул çинчи йĕркелĕхе пăснă 33 тĕслĕх тупса палăртнă. Çав шутра 25 водитель патшалăх техника тĕрĕслевĕ витĕр кăларман транспорт хатĕрĕн рулĕ умне ларнă.