Нумаях пулмасть Шупашкарти С.Максимов ячĕллĕ музыка шкулĕнче çамрăк баянçăсен, купăсçăсен аккордеонистсен конкурсĕ иртнĕ. Вĕсен пултарулăхне жюри членĕсем Ф.Павлов ячĕллĕ музыка училищин директорĕ Александр Белянкин тата çак вĕренÿ заведующийĕн халăх инструменчĕсен уйрăмĕн заведующийĕ Виктор Шепелев хакланă. Конкурсра Вăрнарти ача-пăча ÿнер шкулĕнче  вĕренекен Настя Караваева та хăйĕн ăсталăхне кăтартнă. Аслă ушкăнсем хушшинче виççĕмĕш вырăна тухнă. Настьăна аккордеонпа калама  Анатолий Сурмин вĕрентет. Маттур хĕре Александр Белянкин пĕлĕве малалла тарăнлатма музыка училищине чĕннĕ. Директор çавăн пекех тĕрлĕ конкурссенче çуллен хастарлăх кăтартакан Снежана Максимована та аса илнĕ, уншăн та вĕренÿ заведенийĕн алăкĕсем яланах уçă пулнине пĕлтернĕ. Снежана Чăваш Республикин тава тивĕçлĕ культура ĕçченĕ Владимир Михайлов патĕнче халăх инструменчĕсемпе калама вĕренет. Вăл Владимир Антонович тăрăшнипе  музыка училищинче практика занятийĕнче те пулнă, хăйĕн ăсталăхне туптанă.