Ял тăрăхĕн территорийĕнче «Кольцовка» агрофирма вырнаçнă. Юлашки вăхăтра çак хуçалăх çĕртен тата выльăх-чĕрлĕхрен илекен тупăша палăрмаллах ÿстерсе пыма тытăнчĕ. Сăмахран, иртнĕ çулта  хуçалăх усă куракан кашни 100 гектар çĕр пуçне 272,5 центнер сĕт туса илчĕ. Ку вăл виçĕм çулхинчен 119,7 центнер нумайрах. Кашни ĕнерен сĕт суса илесси те 2365 килограмран 3551 килограма çити ÿсрĕ. Аш-какай туса илессине те кульцавсем çултан çул ÿстерсе пыраççĕ. Пĕлтĕр, тĕслĕхрен, усă куракан 100 гектар çĕр  пуçне 28,4 центнер аш туса илнĕ пулсан, 2006 çулта çак кăтарту 24,2 центнерпа çеç танлашнă.

Кульцавсем юлашки вăхăтра выльăхсен шутне ÿстерсе пырас тĕлĕшпе ÿсĕмлĕ ĕçлеççĕ. Халĕ фермăсенче мăйракаллă шултра выльăхсен шучĕ 464 пуçа çитрĕ, унччен 430 пуç кăна шутланнă. Сăвакан ĕнесен хисепĕ 100 пуçран 170 пуçа çити ÿсрĕ.

Фермăсене çĕнетес тĕллевпе агрофирма патшалăхран çăмăллатнă кредит илчĕ. Икĕ çул хушшинче кунта ĕне тата сысна фермисене çĕнетсе реконструкцилерĕç, унти мĕнпур ĕçе çĕнĕ  технологи никĕсĕ çине куçарса çитерчĕç. Çавна май  выльăхсен шутне татăклăн ÿстерсе пыма анлă çул уçăлчĕ. Акă пĕр тĕслĕх. Пĕлтĕр сыснасен шучĕ 113 пуç шутланнă пулсан, халĕ вĕсен хисепĕ 1001 пуçа çитрĕ. Ку вăл кульцавсен чăннипех пысăк çитĕнĕвĕ!

«Кольцовка» агрофирмăна Валерий Семенович Михайлов ăнăçлă, çирĕп тытса пырать. Ĕне тата сысна фермисене Виктор Антоновпа Владимир Николаев çĕнетсе реконструкцилес, «АПК аталанăвĕ» наци проектне ăнăçлăн пурнăçа кĕртсе пырас, выльăх-чĕрлĕхрен ытларах тупăш илес, ăратлăха лайăхлатас тата ытти вуншар  ыйтăва татса панă çĕрте пысăк тăрăшулăх кăтартаççĕ.