Тĕнче кубокне йыхравлакан реклама щичĕсемпе илĕртÿллĕ билетсенчи арçын ачапа хĕрачана кашниех сăнанă ĕнтĕ. Палăртма кăмăллă, Кубок символĕнчи Денис Павлов - тымарĕпе пирĕн районтан.

Павловсен çемйи - Мулакасси Мăратран. Ултă çул каялла вĕсем Шупашкара куçса кайнă. Денис, çемьери аслă ывăл, спорт шкулĕнче вĕренет. Çулĕсемпе çамрăк пулин те, вăл спортра пысăк çитĕнÿсем тунă, унăн тĕрлĕ ăмăртусенче çĕнсе илнĕ дипломсемпе грамотăсем нумай.

Виçĕмкун Денис вуннă тултарнă. Чăваш еншĕн историлле пулăмра хутшăнма ирĕк çĕнсе илме уншăн - «пĕчĕк юбилейĕнчи» чи пысăк парне.

Хăвăрт утассипе XXIII Тĕнче кубокĕнчен виçĕ кун юлчĕ. Ăна халалласа районта та  тĕрлĕ ăмăртусем йĕркелерĕç. Ĕнерпе паян акă Вăрнарти ял хуçалăх техникумĕн стадионĕнче çăмăл атлетика енĕпе спартакиада иртет. Спортсменсем чупса, тăршшĕпе, çÿллĕшпе сиксе, йĕтре тĕкессипе, сăнăран перессипе ăмăртаççĕ.

Майăн 9-мĕшĕнче Тĕнче кубокĕ савăнăçлă уçăвне Вăрнар районĕнчен пысăк делегаци тухса каять.