Çак кунсенче Чăваш Республикин Президенчĕ Николай Федоров ячĕпе салам телеграмми нумай-нумай килет.

Раççей Федерацийĕн Президенчĕ Дмитрий Медведев Чăваш ен пуçлăхне тата республика çыннисене Çĕнтерÿ кунĕпе саламланă: «Килес ăрусем Тăван çĕршыв  хÿтĕлевçисен, çĕнтерĕве тылра туптанисен, хăрушă вăрçа чăтса ирттернисен тата çĕнтернисен умĕнче пуçне тайрĕç. Пирĕн чи хаклине, пире çĕнтерÿçĕ-салтаксем парса хăварнине, - мире, ирĕклĕхе, аслă çĕршыва - упрамалла», - тенĕ салам телеграмминче.

Дмитрий Медведев çавăн пекех Николай федорова юбилейпе те саламланă: «Сире ĕçлĕ, опытлă профессионал, çивĕч ыйтусене татса парас тĕлĕшпе хăвăр çине яваплăх илме пултаракан çын пек пĕлетĕп. Шанатăп: сирĕн компетентлăх, вăй-хал, ертÿçĕ ĕçĕнчи опыт малалла та Чăваш Республикин тата Раççейĕн интересĕсене тĕпе хурса ĕçлеме пулăшĕç. Патшалăхăн пысăк яваплă ĕçĕнче ăнăçлă тата тухăçлă ĕçлеме сунатăп», - тенĕ унта.

Раççей Федерацийĕн Правительствин Председателĕ Владимир Путин хăйĕн саламĕнче çакна палăртнă: «Чунран тав туса чыслатпăр паян ветерансене. Çухату ыратăвне, юнпа хĕн-асапа çĕнтерсе вĕсем чăтăмлăхăн иксĕлми вăйне кăтартнă, çапса аркатнă тăшман çийĕн Çĕнтерÿ ялавне вĕлкĕштернĕ. Пирĕн, вĕсен ачисемпе мăнукĕсем, вĕсен паттăрлăхне тивĕçлĕ пулмалла». Владимир Путин çавăн пекех Николай Федорова Тăван çĕршыв умĕнче пурнăçлакан ĕçре ăнăçу, çирĕп сывлăх, ырлăх суннă.

«Çак уяв сирĕн асăрта, чĕрĕрте пулĕ. Çак кун эпир хамăрăн аслă халăхпа, вилĕмле хăрушлăх умĕнче çухалса кайман, пĕтĕçсе фашизма çĕнтернĕскерпе, уйрăмах мухтанатпăр. Халăхсен пĕрлĕхĕнче - пирĕн вăй, пулас çитĕнÿсен никĕсĕ», - тенĕ Раççей Федерацийĕн Федераци Пухăвĕн Федераци Канашĕн Председателĕ Сергей Миронов. Раççей парламенчĕн çÿлти палатин спикерĕ Чăваш ен Президентне юбилейпе саламласа çакна палăртнă: «Эсир республикăн социаллă пурнăçпа экономика аталанăвĕн çивĕч ыйтăвĕсене профессионал шайĕпе тата ĕçе тĕпрен пĕлнипе татса паратăр. Çавна май сирĕн авторитет тата хисеп чăваш ен халăхĕ умĕнче уйрăмах ÿсрĕ».

Раççей Федерацийĕн Федераци Пухăвĕн Патшалăх Думин председателĕ Борис Грызлов Çĕнтерÿ кунĕ ячĕпе саламланинче çĕнтерÿçĕсен ĕмĕр манăçми паттăрлăхĕ çар чысĕн, çĕнтерессе шанса тăнă кăмăл çирĕплĕхĕн, ăс-хакăл мăнаçлăхĕн тата пирĕн нумай нациллĕ халăх фашизма çĕнтерессишĕн, Тăван çĕршыв ирĕклĕхĕпе никама пăхăнманлăхĕшĕн пĕр чăмăра пĕрлешнин ĕмĕр сÿнми тĕслĕхĕ пулнине, малашне те çаплăх пуласса палăртнă.

Юбилей ячĕпе Чăваш Республикин Президентне Раççей Федерацийĕн Правительствин Председателĕн çумĕ - Раççей Правительствин Аппарачĕн Ертÿçи, çу уйăхĕн 12-мĕшĕнчен Раççей Федерацийĕн Президенчĕн Администрацийĕн Ертÿçи Сергей Нарышкин саламланă: «Эсир хăвăра талантлă, пуçаруллă, шанса панă ĕçшĕн пысăк яваплăха туякан йĕркелÿçĕ пек кăтартрăр. Эсир тÿрремĕнех хутшăннипе Чăваш Республики Раççей Федерацийĕн пĕр тикĕс аталанакан субъекчĕсенчен пĕри пулса тăчĕ. Строительство аталанать, промышленноç тата ял хуçалăх производствин кăтăртăвĕсем ÿсеççĕ. Республикăра инвестицисене явăçтарас енĕпе кирлĕ пек ĕçлеççĕ».

«Сирĕн ĕçченлĕхе, профессионализма, ертÿçĕ ăсне, Чăваш Республикин социаллă пурнăçпа экономика аталанăвĕн ыйтăвĕсене татса памашкăн ырми-канми  ĕçленине патшалăхăн пысăк наградисемпе тивĕçлипе палăртнă, вĕсем Республикăра пурăнакансем Сире  чунран шаннин никĕсĕ пулса тăраççĕ», - тенĕ Раççей Федерацийĕн Правительствин председателĕн, халĕ Владимир  Путин Правительствинче пĕрремĕш вице-премьер должноçне йышăнакан Виктор Зубковăн телеграмминче.

Серби Республикин Правительствин Председателĕ Воислав Коштуница: «Пĕрле тĕл пулнă вăхăтра Эсир чăн-чăн тус пек хавхалантарнине, Сербие, серб халăхне хисеплени çинчен каланине лайăх ас тăватăп. Эсир ертсе пынипе Чăваш Республики ăнăçусене паллă тунăшăн, Сирĕн мĕн пур граждан ырлăхĕшĕн нумай енлĕ аталанса, малалла кайса пынăшăн уйрăмах хавас. Эсир тăрăшнипе социаллă инфратытăм пысăк хăвăртлăхпа  аталанать, пурăнмалли çуртсем, çулсем нумай тăваççĕ, вĕрентÿпе сывлăх сыхлавĕн тытăмĕсене модернизацилеççĕ, Чăваш ен гражданĕсен пурнăç шайĕ ÿсет, республика раççейри чи аталаннă регионсенчен пĕри пулса тăрать».

Хăвăрт утас енĕпе XXIII Тĕнче кубокне хатĕрленсе ирттерме ырми-канми тăрăшнăшăн Пĕтĕм тĕнчери çăмăл атлетика федерацийĕсен ассоциацийĕн ŸIAAFŸ президенчĕ Ламин Диак Чăваш Республикин Президентне ылтăн медаль панă. Раççей общество комиссийĕ чăваш ен Президентне Аслă Петĕр ячĕллĕ наци премийĕн лауреачĕн дипломĕпе - ертсе пырас ĕç сферинчи «Чăваш Республикине эффективлă ертсе пынăшăн тата Раççей патшалăхне аталантарас ĕçе пысăк тÿпе хывнăшăн» Раççейĕн чи пысăк общество наградипе чысланă.

Космос проекчĕсемпе программисене пурнăçлама хутшăннăшăн Раççей Космонавтика федерацийĕ Чăваш ен Президентне «Тава тивĕçлĕ ĕçсемшĕн» медаль панă. Пĕтĕм тĕнчери общество ăслăлăхĕсен академийĕ Николай Федорова «Владимир Мономах» орденпа чысланă.

Чăваш Республикин пуçлăхне Николай Федорова юбилей ячĕпе çавăн пекех Беларуç Республикин Президенчĕ Александр Лукашенко, Казахстан Республикин Президенчĕ Нурсултан Назарбаев, ĕç тăвакан влаçăн федераци органĕсен ертÿçисем, Раççей Федерацийĕн субъекчĕсен пуçлăхĕсем, Федераци Канашĕн членĕсем тата Раççей Патшалăх Думин депутачĕсем, ют çĕршывсен посолĕсем, предприятисемпе организацисен ертÿçисем, Чăваш Республикинче, Раççейĕн ытти регионĕнче пурăнакансем саламланă.