Сывă ача вĕренÿре те пысăк ÿсĕмсем тăвать, тантăшĕсем хушшинче хăйне хăюллăрах тытать, унăн интересĕсем те тĕрлĕ енлĕ. Сывлăх вара чи малтанах - спорт, физкультура, сывă пурнăç йĕрки. Çакна эпир яланах асра тытатпăр, ачасене вăй-хал енчен çирĕпленме, ÿт-пĕве тĕреклетме пĕтĕм майсем туса пама тăрăшатпăр. Калининăри вăтам шкулта, акă, спортăн тĕрлĕ тĕсĕсемпе ăмăртусем, вăйăсем час-часах иртеççĕ. Хăйсен сывлăхне усă кÿнипе пĕрлех вĕренекенсем тăван шкул ят-сумне те çÿле çĕклеççĕ – районти ăмăртусенче те вĕсем яланах малтисен йышĕнче.

Нумаях пулмасть, Калининăри шкул ачисем пурте туслăн «Ылтăн кĕркунне» кроса хутшăнчĕç - 1-11-мĕш классенче вĕренекенсем пĕтĕмпе 278 ача. Ăмăрту дистанцийĕсем иккĕ пулчĕç: кĕçĕн классенче пĕлÿ пухакансем - пĕр çухрăм, аслисем виçĕ çухрăм чупрĕç. Калас пулать, ăмăртуçăсем питĕ маттур тупăшрĕç, пурте лайăх вăхăт кăтартма тăрăшрĕç. 1-мĕш класра вĕренекенсем хушшинчи çĕнтерÿçĕсем, акă - Эдик Быковпа Даша Горбачева, 2 - 3 классенче чи маттуррисем - Дима Козловпа Лена Михайлова. 4 - 5-мĕш класра пĕлÿ пухакансенчен хăйсен дистанцине чи малтан Саша Галкинпа Оксана Платонова чупса тухрĕç. 6 - 7-мĕш классенче вĕренекенсенчен чи хăвăрт чупакансем -  Софрон Ржановпа Настя Петрова, 8 - 9-мĕш классем хушшинче Гриша Егоровпа Лена Иванова пулчĕç. Çавăн пекех 10 - 11-мĕш  класри ачасенчен Федя Виноходовпа Надя Репина çĕнтерÿçĕсен ятне тивĕçрĕç.

Пĕтĕмĕшле командăсен ăмăртăвĕнче пĕрремĕш вырăнсем çапла пайланчĕç: кĕçĕннисен йышĕнче - 2 «а» класра,  аслисенчен 7 «а» класра вĕренекенсем мала тухрĕç.