Пасар кунĕнче Калинино çывăхĕнчи пĕр ялти пĕлĕшĕме тĕл пулнăччĕ.

- Кÿршĕ пирĕн сала пирки радиоэфирпа информаци тухнине каларĕ. Мĕн çинчен-ши, илтмен-и; - ыйтрĕ вăл.

- Эпĕ те  илтмен - кил хушшинче ĕçленĕ те. Анчах район хаçатĕнче тăван тăрăх аталанăвĕ пирки тĕплĕн çырса кăтартнă. Кăсăкланан пулсан, вулаттарăп, - тавăртăм ăна.

Тепĕр тĕслĕх те илсе кăтартма пулать. Ялта нумаях пулмасть пурăнма пуçланă çамрăк арăм çăвĕпе хĕле хатĕрленсе банкăсемпе ĕçлерĕ. Кÿршĕри ватă хĕрарăм ыйтмасăр чăтаймарĕ: ăçтан-ха унăн çакнашкал консервлас ăсталăх; Иккен, çамрăкăн опыт та çук, пĕтĕмпех «Çĕнтерÿ çулĕнчи» рецепт-сĕнÿсемпе усă курать. Питĕ кăмăллă.

Чăн та, район хаçачĕ тĕрлĕ информацисемпе пуян. «Çĕнтерÿ çулĕ» тăрăх эпир районта, республикăра, çĕршывра пулса иртекен событисем çинчен пĕлетпĕр.

Шкул ачисемшĕн те вăл - вĕрентÿллĕ хаçат. Ытти вĕрентÿ учрежденийĕсем  мĕн ĕçлени, тантăшĕсем мĕнпе кăсăкланни хăйсене те аталанма пулăшать-çке.

Интереслĕ калавсем, çĕнĕ сăвăсем, специалистсен канашĕсем... - пурте пур. Çитменнине статьясенчи сăнарсем - эпир паллаканнисем, вăл е ку ĕçпе палăрнисем. Тăтăш çырăнса илекенсемшĕн хаçат темрен те хаклă. Радиопа, сăмахран, хăш-пĕр информацие илтмесĕрех юлма пулать - яланах приемник çумĕнче лараймастăн-çке. Хаçат вара пур чухне те  юнашар, хăвна меллĕ вăхăтра вулама, кирлĕ статьясемпе сĕнÿсене касса илме  пултаратăн. Çавăн пек тус кашниннех пулмалла. Эппин, хăвăртрах «Çĕнтерÿ çулĕпе» туслашма тăрăш.