Сурăхпа путексем вăрланă
· Февралĕн 18-мĕшĕ умĕнхи каçхине Туçи-Çармăс ялĕнчи М. хуçалăхĕнчен сурăхпа икĕ путек çухалнă. Хăйсем тĕллĕн мар, такам пулăшнипе. Хальлĕхе палăртман çын сарайне ирĕклĕнех кĕрсе тухнă, кил хуçине пĕчĕк мар тăкак кÿнĕ.
· Февралĕн 17-мĕшĕнче 21 сехет иртсен Вăрнарта та ют пурлăха çаратнипе çыхăннă преступлени пулнă - поселокри пĕр урамра ларнă ВАЗ-2111 автомашинăна тустарнă. Машинăн пассажирсем енчи алăк çăрине çĕмĕрсе кĕрсе ЖК-телевизор тата автомагнитола вăрланă.
· Çав кунах шалти ĕçсен Вăрнар районĕнчи пайĕн «Шырав» ушкăнĕ Калининăра 26-ри Л.-на тытса чарнă. Оперативлă шырав ĕçĕсене ирттернĕ май, вăл хăйĕн килĕнче хăнара пулнă арçыннăн «Самсунг» телефонне вăрлани палăрнă.
· Февралĕн 12-мĕшĕнче вара улталаса Калининăри шкул-интернат воспитанникĕнне кĕсье телефонĕ йăкăртса кайнă. Милици ĕçченĕсем «вĕри йĕрпе» кайса, преступление Шупашкар районĕнче вăхăтлăх пурăнакан П. пурнăçланине тупса палăртнă. Вăл шалти ĕçсен Çĕрпÿ районĕнчи пайĕнче те шыравра шутланать.