«Вăрнар лесничестви» патшалăх предприятине Калининăри, Авруйĕнчи, Вăрнарти участок лесничествисем кĕреççĕ. Палăртмалла, Çарăклăри участок лесничестви Вăрнарти участок лесничествин тытăмне кĕрет. «Вăрнар лесничестви» патшалăх предприятийĕнчи вăрмансен лаптăкĕ - 33174 гектар. Вăрманта юр ирĕлме тытăннă вăхăтран кĕрхи çумăрлă çанталăк пуçланиччен (е юр çуса лартиччен) çак ĕçсене тума юрамасть:

- лăсăллă хунав вăрмансенче, йывăç ÿкнĕ вырăнсенче, вутă хатĕрлесе хунă çĕрте, касмалли вăрмансенче, курăк типсе ларнă вырăнсенче кăвайт чĕртме*

- çунакан шăрпăка, пирус тĕпне вăрманта пăрахма*

- çунтармалли-сĕрмелли материалсемпе ислетнĕ япаласене вăрманта хăварма.

Вăрман каснă вырăнсене вăхăтра тасатманни пушар тухас хăрушлăха ÿстерет. Тата çакна асра тытмалла: хăварнă тĕш йывăç (древесина) çинче çанталăк ăшăтма тытăнсан сăтăр тăвакан хурт-кăпшанкăсем ĕрчеççĕ, кăмпаллă чирсем аталанаççĕ. Вĕсем кайран сывă вăрмана куçаççĕ.

Вăрман хатĕрленĕ чухнех тĕш йывăçсене тасатмалла. Ĕçе пурнăçланă вăхăтра уйрăм харпăрлăхçăсен те, предприяти-организацисен те пушар хăрушсăрлăх правилисене пăхăнмалла. Çак правилăсемпе килĕшÿллĕн çул-йĕр организацийĕсен автоçул, чукун çул тăрăхĕсене çÿп-çапран, типĕ йывăçсенчен, вĕсен тураттисенчен тасатмалла. Электропередача тата çыхăну линийĕсем пур вырăнсене лайăх пăхса-асăрхаса тăмалла.

Вăрнар район администрацийĕн ака уйăхĕн 7-мĕшĕнче тунă йышăнăвĕпе килĕшÿллĕн типĕ курăка, çÿп-çапа çунтарма юрамасть.

Çурхи уявсене час-часах вăрмансенче ирттереççĕ. Çавăнпа та асăрхануллă, тимлĕ пулмалли çинчен манмалла мар. Тепĕр тесен сывлăш температури хăпарнипе те пушар сиксе тухма пултарать. Вут-çулăм аташма пуçларĕ-тĕк васкасах вырăнти администрацие е лесничествăна пĕлтерĕр.