Шкул ачисен спартакиади йĕркипе Чăваш ен Президент Кубокĕшĕн кăçалхипе вунпĕрмĕш хут иртекен ăмăртăвĕсенче кăçал волейболистсем те палăрчĕç.

Командăн тĕп шăнăрĕ - Çĕрпелти вăтам шкулта вĕренекенсем: Андрей Алексеев, Александр Захаров, Василий Мышкин, Григорий Феофанов, Сергей Шашков, Игорь Шашков. Çавăн пекех районăн пĕрлештернĕ командишĕн Кульцав шкулĕнчи Александр Михайловпа Юрий Аверкин, Калининăри Александр Спиридонов вылянă.

Финалта çамрăк волейболистсем  Муркаш, Тăвай, Сĕнтĕрвăрри районĕсенчи шкулсен командисемпе тĕл пулнă, пĕрремĕшсене 3:1, иккĕмĕшсемпе виççĕмĕшсене 3:0 шутпа парăнтарнă. Çапла вĕсем спартакиада историйĕнче волейболпа пĕрремĕш хут Президент  Кубокне тата Диплома çĕнсе илнĕ.

Çак çитĕнÿре тренерăн - Çĕрпелти шкул директорĕн воспитани енĕпе ĕçлекен çумĕн Иван Петрович Николаевăн - тÿпи пысăк. Вăл хăй те спорта пуçĕпех парăннă, тĕрлĕ ăмăртусене хаваспах хутшăнать. Тренер ĕçне укçалла мар, чунĕ ыйтнипе пурнăçласа пырать. Командăна хатĕрлеме ăна шанни те ăнсăртран мар. Кăçал çĕрпелсем шкулсем хушшинче спортăн ку тĕсĕпе чемпионсем пулса тăчĕç.

Тренер пĕрлештернĕ командăпа эрнере пилĕк хутчен тренировкăсем ирттернĕ. Ăнăçăвĕ - куç умĕнче. Команда çĕнтерÿçĕ пулса тăнă, спортсменсем вара уйрăм титулсене тивĕçнĕ: Г.Феофанов - чи лайăх пас паракан, В.Мышкин - чи лайăх хÿтĕлевçĕ, А.Михайлов - чи лайăх тапăнса вылякан.