Çуркунне çутçанталăк чĕрĕлнипе пĕрлех вăрăсем те вăранчĕç пулмалла. Шалти ĕçсен районти пайне унтан та кунтан пурлăха çаратнă тĕслĕхсем çинчен пĕлтереççĕ.

Май уйăхĕн 10-мĕшĕ умĕнхи каçхине, акă, вăрăсем Малти Ишек ялĕнче тустарнă. Вĕсем Ф.-н урамра çурт  умĕнче ларакан Иж «Ода» автомашинине куç хывнă, унăн хыçри икĕ урапине ирĕклĕнех кăларса илнĕ. Транспорт хуçине 2 пин тенкĕлĕх тăкак кÿнĕ.

Май уйăхĕн 8-мĕшĕнче йĕрке хуралçисен Çăлкас Кăкшăмра та шырав ĕçĕсене ирттерме тивнĕ. Кунта К.-н хуçалăхĕнче такам вăрттăн хуçаланнă, алăк çăрине çĕмĕрсе çурта кĕнĕ, апат-çимĕç вăрласа тухнă. Киревсĕр ĕç тăвакана çийĕнчех ярса илнĕ, вăл çывăхрах тупăннă. Вăрланă апат-çимĕçĕн пайне каялла тавăрма май килнĕ.

Май уйăхĕн 5-мĕшĕнче Çĕрпел-Вăрнар автоçул çинче, поселока кĕнĕ çĕрте, шалти ĕçсен районти пайĕн «Шырав» ушкăнĕ ВАЗ-2112 автомашинăна чарнă. Багажника уçса пăхсан милици сотрудникĕсем пулă тытмалли 9 тетел, вĕрсе тултармалли икĕ кимĕ, вăлта, тытнă пулăсем выртнине курнă. Водительпе пĕрлех автомашинăра тата пассажирсем пулнă. Çапла, тĕрĕслев ирттернĕ май, С.-па Е. пулла саккунсăр майпа - тетелсем лартса - Санарпуç ялĕ айăккинчи пĕвере тытни палăрнă.