Чăваш Республикин Патшалăх Канашĕн депутачĕсем пĕр саслă пулса, çула çитмен çамрăксем валли «комендант сехетне» çирĕплетнĕ. Депутатсем йышăннă çак саккун 18 çула çитмен ачасене хăш-пĕр уйрăм объектсенче тата каçхине ашшĕ-амăшсĕр обществăлла вырăнсенче  çÿреме чарать. Унăн  тĕп тĕллевĕ - ачасен сывлăхне тата пурнăçне сиен кÿрессине асăрхаттарасси.

Малашне талăкри хăть хăш вăхăтра та 18 çула çитменнисен ясарлăх паллиллĕ тавар сутакан вырăнсенче, эрех-сăра сутакан бар-ресторансене, рюмочнăйне кĕме юрамасть. Каçхи вăхăтра вара - 22 сехетпе 6 сехетчен - вĕсемшĕн обществăлла вырăнсенче ашшĕ-амăшĕсĕр çÿреме те çул хупă пулĕ. Ку вырăнсем шутне урамсене, стадионсене, парк-скверсене, обществăлла транспорта, интернет-салонсене, лавккасене тата клубсене кĕртнĕ. Çуллахи тапхăрта - июнĕн 1-мĕшĕнчен пуçласа августăн 31-мĕшĕччен, çула çитменнисен 23 сехетчен уçăлса çÿреме ирĕк пур.

Ку саккун ыйтнине пăхăнманшăн, уйрăммăн илсессĕн, ашшĕ-амăшĕсене тата юридически сăпатсене административлă явап тыттарма пăхнă.

Депутатсем йышăннă саккуна Чăваш Республикин Президентне алă пусса çирĕплетме ярса панă.