Шахматла выляма чĕннĕ те хĕрарăма пусмăрланă
Раççей Федерацийĕн Прокуратури çумĕнчи Следстви комитечĕн Чăваш Республикинчи Следстви управленийĕн Канашри районсем хушшинчи следстви пайĕ Вăрнарта пурăнакан 48-ти, ниçта та ĕçлемен арçын тĕлĕшпе пуçарнă уголовлă ĕçе тишкерессине вĕçленĕ.
Вăл РФ Уголовлă кодексĕн 111-мĕш статйин 1-мĕш пайĕпе (çын сывлăхне юриех йывăр сиен кÿнипе вăл вилсе кайнă тĕслĕхпе) тата 131-мĕш статйин 2-мĕш пайĕн «б» пункчĕпе (вĕлерессипе хăратса хĕрарăма мăшкăлланăшăн) айăпланать.
Малтанхи следстви палăртнă тăрăх, вăл пĕлтĕрхи декабрĕн 21-мĕшĕнче хăйĕн патне хăнасене шахматла выляма тата эрех ĕçме чĕннĕ. Спиртлă шĕвексем пуçа кайса минретсен хăнасенчен пĕри (66-ри арçын) çывăрса кайнă. Çакăнпа усă курса кил хуçи унăн 57-ри арăмне мăшкăллама шут тытнă. Çĕçĕ ярса илсе хĕрарăма алăпа, патакпа çапма тытăннă, хăйĕнпе ар çыхăнăвне кĕме ыйтнă.
Шăв-шава илтсе хĕрарăмăн упăшки сасартăк вăранса кайнă, кил хуçине хирĕç тăма хăтланнă. Анчах лешĕ пукан ярса илсе ăна пуçран тата кĕлеткерен темиçе хутчен те кĕрслеттернĕ. Арăмне пусмăрçăран çăлас тенĕ арçын хăй тăнне çухатнă.
Кил хуçи вара пуçа пырса кĕнĕ киревсĕр шухăша пурнăçланах - çĕçĕ кăтартса, вĕлерессипе хăратса хĕрарăма мăшкăлланă.
Суд йышăнăвĕпе пусмăрçăна следстви вăхăтĕнче ирĕкрен хăтарнă. Следстви айăплав тĕлĕшпе çирĕплетÿ базине туллин пухнă, уголовлă ĕçе Вăрнар район судне пăхса тухма ярса панă.
А. СПИРИДОНОВ,
РФ Прокуратури çумĕнчи
Следстви комитечĕн
Чăваш Республикинчи Следстви управленийĕн
Канашри районсем
хушшинчи следстви пайĕн
уйрăмах пĕлтерĕшлĕ ĕçсемпе тимлекен
следователĕ.
"Çĕнтерÿ çуле"